كيف تعمل من المنزل في زمن كورونا

فيروس كورونا COVID-19 هجومه كان شرس جدا و مفاجئ. للاسف, ده اثر باشكال كتير جدا علي الاقتصاد العالمي لان اعمال كتير جدا اتوقفت في محاولة للحد من انتشار الفيروس. لان تواجد موظفين كتير في مكان واحد في الظروف زي دي ممكن يكون سبب في كوارث و ضرر لاسر كتير في اماكن مختلفة.

بعض الشركات قررت توقف التواجد في الشركة لكن مش هتوقف شغل … طبعا الانترنت مخلاش حاجة معملهاش و دة سهل فكرة الشغل من البيت بالذات للشركات اللي بتشتغل في البيع من خلال مواقع التواصل الاجتماعي او التسويق الالكتروني. بعض الشركات بيكون شغلها كله علي الانترنت و دة كان سبب انها تقدر تكمل شغل. لو انت موظف في شركة من دول … يبقي المقالة دي هتفيدك .

اغلب الناس اللي عاشين الحياة الوظيفية بيكونوا متعودين انهم مرتبطين بمواعيد و حضور و انصراف. ده غير انه مش محتاج يقوم من علي مكتبه لانه ببساطة لو احتاج اي حاجة من اي حد من زملاءه هيلاقيه قاعد ع المكتب اللي جمبه و طبعا وقت البريك معروف. طبعا بتسأل نفسك ايه المفيد من وصف الحياة الوظيفية ! … ببساطة الوصف ده هينقلنا للنقطة الاهم و محور المقالة و هو ان الموظف اللي هيشتغل من البيت وقته هيتوه منه لانه لو مكنش عنده اصرار و تعود انه يكمل بنفس النظام يبقي هيفشل غالبا في شغله و كل حاجة للاسف هتتلخبط.

اهم حاجة في مرحلة ال  working from home هي النظام . تنظيم الشغل في المرحلة دي مهم جدا و بيتقسم علي حاجتين. الحاجتين دول بيكملوا بعض و بيحافظوا علي انتظام سير العمل بشكل فعال.

تنظيم الوقت:

تنظيم الوقت في المرحلة دي مهم جدا لانه بيكون العامل الاساسي في دعم و افشال الترتيب. بمعني ان تنظيم الوقت من اول الصحيان في معاد معين لحد انتهاء ساعات العمل مرورا بالراحة و ترتيب وقت ال tasks و عددها بيكون هو الداعم الحقيقي لل work output او نتائج العمل.لو الشخص قدر انه ينظم وقته و يعرف كل حاجة هتبدأ امتي و تخلص امتي ده هيوفر عليه وقت و مجهود كبير و هيعلي نتائج الشغل اكتر.

تنظيم الاوراق و حفظها (filing):

تاني اهم حاجة في تنظيم سير العمل هو نظام ترتيب الاوراق الخاص بيك. في المكتب بيكون ليك مكان خاص بيك مش مسموح لاي شخص يقرب منه و ده بيضمنلك ان الورق دايما موجود و في مكانه. لكن في البيت وارد ان الورق يتعرض لاي شخص عن طريق صدفة و دة ممكن يضيع ورق او شغل. يعني طفل قطع الورق او مسح ملف مهم و هو بيشغل فيلم علي اللاب توب مثلا. عشان كدة من الضروري ان الورق يكون محطوط في مكان امان بعيد عن الاطفال و انك يكون مرتب الورق بشكل يضمنلك سهولة الوصول ليه عشان تقدر تحافظ علي وقت الشغل و تستغله بدل م يضيع منه كتير و انت بتدور او كل شوية ترتب الدنيا. و طبعا لو بتشتغل علي جهاز كمبيوتر ف لازم تحافظ علي الملفات في مكانها.

ناس كتير لما بتخرج من جو المكتب بتبتدي تخسر تركيزها و مش بتهتم بالنظام و جودة الشغل. و طبعا بتخسر التواصل مع الزملاء بشكل فعال يساعد في سير العمل. و دي حلها بسيط. الانترنت بيوفرلنان مواقع كتير نقدر من خلالها اننا نحافظ علي التواصل تاعملي عشان نتابع سير العمل باكتر من برنامج فعال.

• Slack

برنامج بيتك تحميله عشان يسهل التواصل عن طريق الرسائل او الصور و تقدر من خلاله تسأل اي حد من زملائك علي اي حاجة تخص الشغل.

• Zoom

برنامج بيسهل الاجتماعات الالكترونية و بيساعد المديرين يجتمعوا بالموظفين عن طريق مكالمات مجمعة او فيديو

• Trello

برنامج بيسهل تسليم المهمات للموظفين المختصين و متابعة خط سيها بالتواريخ و المراجعة بسهولة.

تنظيم الشغل مهم و الاهتمام بالوقت و القدرة علي استغلاله دي اكتر حاجة ممكن تخليك مميز في اي نشاط انت مهتم بيه و تزود انتاجيتك خصوصا لو استغليت بعض وقتك في انك تدرس و تتعمق اكتر في مواضيع كانت بتقابلك دايما في مجالك و كنت بتتجاهلها. فتقدر تطورمن نفسك و تاخد خطوات للاحسن. و مع رجوع سير العمل للطبيعي هيبقي ليك اثر واضح و ظهر مدي التزامك بالشغل و اهتمامك بانك تطلع باحسن النتائج.

هذه المقاله مقتبسة من موقع سي في ورلد https://ift.tt/3dCYVZ7

مصدر هذه المقالة https://ift.tt/2AgWZak

مصدر هذه المقالة https://ift.tt/3fK3Eu7
via IFTTT